好少好少睇香港電視劇。對上一次有追睇既電視劇又係ViuTV, 已經係 2020年既 《二月廿九》。
今次呢套《三命》之所以會睇, 一來係903電台「在睛朗的一天」講左幾次。二來原來係杜琪峯同游乃海監製，好似話係杜Sir 三十幾年來再做電視劇，值得一看。
三命個故事就用左十二集去講一個人由出世到死，60年（一個甲子）既三種命運。
中學時代既駱澤信，已經非常熱愛畫漫畫。為左搵出搞衰佢份漫畫既「四眼狗」而整左個陷阱。而駱澤信既人生就由呢個位開始，透過呢一隻風箏，帶出駱澤信既「三命」。
第一命
阿信遇上「四眼狗」（林海琪）。因為四眼狗既鼓勵阿信立志要成為一個漫畫家。 就係呢一命既重要決定。
阿信成個人生都係沉醉於畫漫畫。
漫畫家呢一命，故事夠豐富。阿信既漫畫事業起起跌跌, 半生大起大落。一時窮得潦倒生活，一時有人賞識開出版社作品大賣。後來重遇「四眼狗」 夢中情人林海琪。有情人終成眷屬，似乎係完美結局。
因為佢太沉醉於漫畫，佢同父親既關係不太好。甚至父親病殁，都係事後先知。另一邊又因為自己性格，江朗才盡，跌入人生谷底，甚至林海琪因為佢而流產。一個起起跌跌，上上落既人生。最終達成志願，成爲成為著名漫畫家。後來妻子意外過身（一屍兩命），似乎看透人生，以教畫為下半生。
第二命：
同第一命唔同，開始時阿信並沒有遇到「四眼狗」。後來阿龍錯手殺死社團大佬，阿信卻決定為阿龍頂罪坐監。呢個決定就成為呢一命既重點。
出獄之後，因為與阿龍（社團古惑仔）既兄弟關係入左黑道。就算後來阿龍俾人斬死，阿信既「生意」都好幸運可以愈搞愈大。撈偏發財之後，自然就撈白，地產金融生意大賺，成為富翁。
不過就算佢再有錢，甚至再遇返「四眼狗」，都得唔到認同。同家人既關係就更不用說。出獄之後既阿信發現阿爸出軌，令到阿信同父親駱耀成既關係決裂。
原諒佢，即係放過自己
— 林寶燕
我做錯左事，所以失去你地
— 駱耀成
最後父親病歿，阿媽出家, 兄弟阿勤因為阿信而意外傷殘，阿信先醒覺。
最後阿信60歲都仲可以搵到真愛，同郭愛瑜（周秀娜飾演）一齊。
第二命既情節，故事，佈局，攝影技考，燈光都好《黑社會》，好有杜Sir 既影子。始終黑道電影係杜琪峯既拿手好戲。第二命既阿信，雖然“殺過人”，坐過監，撈偏，有錢有“事業” 。但係除左錢，就好似乜都無。身邊既係馬仔跟班都唔係佢既兄弟佢既朋友。唯一信得過既阿勤都唔信佢。好合符佢阿爸駱耀成所講：
種甚麼因，得甚麼果
可幸最後阿信都明白呢個道理，年老都叫做享下福。
第三命
開始就係因為阿信跟住個隻紅色風箏，發現左原來阿爸有外遇。因為咁樣阿信就聽阿媽話努力讀書，唔去畫漫畫， 疏遠阿龍。呢個就係呢一命既重點。
後來阿信更搵到份規劃署既政府工，結婚生仔。一個典型打工一族。儘管阿爸出軌，同父母既關係係始終唔太疏離。雖然有創業同埋漫畫出版社既機會，但係阿信都因為「有老婆仔女」唔敢冒險而放棄左。
呢一命之中, 阿信更遇返「四眼狗」林海琪（另一時空）。但係阿信終於都因為自己已經有家室，唔想重蹈覆轍阿爸既出軌而無疾而終。
到後來舉家移民，自己留係香港做太空人，照顧患癌既阿爸。辛辛苦苦過左大半生，安份守己。結果係阿媽老人痴呆症，阿爸癌病。
後來又一段同前上司郭愛瑜（另一時空）既關係，都因為自己唔想重蹈父母既覆轍而退縮左。換來既係老婆（陳家瑩）因長期兩地分離而離婚收場。
第三命就好似大部份人一樣，打份正職，穩穩陣陣，生兒育女，照顧家人，安份守己。但係有時唔代表就會得到應有既回報。
最後阿信繼續工作到退休，平平淡淡。退休之後先搵返自己既興趣：畫漫畫。
不過無論三條命(時空) 係點, 駱澤信既結局都係同一時間係漫畫之中過世。
人做每一個決定，都會影響佢既將來。蝴蝶效應1 ,平行宇宙/ 多重宇宙(Parallel Universe / Many-worlds interpretation)2 就係講梗類似既嘢。
蝴蝶效應常被解釋為：「一隻蝴蝶在巴西輕拍翅膀，可以導致一個月後德克薩斯州的一場龍捲風。」意即「微不足道的小改變，也可能帶來巨大的改變」
一件事件發生之後可以產生不同的後果，而所有可能的後果都會形成一個宇宙
科學家用科學去嘗試解釋多重宇宙究竟有無存在既可能，太深奧我就唔識。有興趣google 下Many-world Theory, parallel universe , 就會搵到有好多唔既理論。
我就覺得非常有趣。試想下：
如果當年我考CE考AL 答錯左幾條問題, 或者答中多幾條問題。咁我既另一命會係點呢?
如果當年大學我無揀讀護理系，走去讀Pure Science Biology, 我既另一命會係點樣既人呢?
如果我遇到另一個伴侶, 我既另一命又會係點呢?
主要角色：
- 駱澤信 — 林璟熹（飾演童年）；吳澤烽（飾演少年）；蘇家樂（飾演青年）；陳國邦（飾演中年）
- 林海琪 — 米拉（飾演少年）；林愷鈴（飾演青年）；陳倩揚（飾演中年）
- 林貫勤 （阿勤）– 王汶彥（飾演童年）；徐浩昌（飾演青年）；阮德鏘（飾演中年）
- 陳家瑩 （公務員一命，阿信既妻子) — 伍詠詩飾演
- 郭愛瑜 — 周秀娜飾演
- 駱耀成 （阿信父親）– 張錦程飾演
- 林寶燕 （阿信母親）– 陳佩思（飾演青年及中年）；李麗麗（飾演老年）
- 楊國龍 （阿龍） — 楊凱博（飾演少年）；胡子彤（飾演青年）
監製：杜琪峯、游乃海、朱淑儀
導演：李子俊、張家傑及黃偉傑
